2Jo | ASO | STEP |

ZOHANE' GIZINE' LUHUVO NITE' NABA 2

2 John

Kilisito' Lo-limine' Mono' Nene Do Gili' Lo Daloningumu' Gizine' Gamazi

1 O'moso'mo do kegeso ei' ve lo gele'mize molani' vene' make, gizebo ve naza gezesi ido' izipaha zuhosi lu'ne lamine' lengeme nouvoni' aleve lengikumu' luhuvo nite' mene nogize lingimuve. Ido' nenikovo' lu'ne lengeme nouvoni' nevoba gamazi gihile gili lamine' i nizave mukikisi a'mine'mine igi lu'ine lingimaa' nave. 2 Ido' laza lute lengemaa' noune' nene a'mine gamazi gihile ne'mo leli' luteu' mino lelita minevo' minevo' ogo mineline' nenako nemu' nene lute lengemaa' noune. 3 Ido' Meteho O'moso ido' eze gipele Izesu' Kilisito' ingine lu'ine limi nizasinako lamine' muhelete ningi nasahili' i-lidi mulude di hongu li-lidilisive.

4 Ido' izipaha zuho linge ma meteho lo huko-lidido' gili di gamazi gihile've nene di mini nizavo ne'mi gamazi gelo mulu'neu' lamine' goloso gelekuve. 5 Ido' vene' make, O'moso'mo lo huko-lidine' gamazi ma lo-gemekuvo geleline losa noluve. A'mine gamazi nene gosoho' nomive. Litehe ma monovolati' vomine gele'mo gele'mo ogo minune' nene ti' lo lo-gemelove: Laza muki' lute ne geme ge neme lo minelesune. 6 Lute O'mososi evenekisi ngemaali'mi monovo ne'mino neive: Laza O'moso'mo lo huko line' gamazilo' gele do'mo ogo minelesune. Ido' lingine lo huko line' gamazi nene monovolati' vomine gili'mi gili'mi igi minani'. Ti' lo neive: Lingine lutine ngimi'mi vi minilisave.

7 Soza mono' li evene' ngele'mize gopo iga' ave muki' soto' igi misubou' misubou' nimonave. Ingine Izesu' Kilisito' aza leli' haza eveneliti okode ne'minesi soto' ine' ve li gili imisa'mave. A'ne'mine ve nene soza mono' li evene' ngele'mize gopo iga' ave mini Kilisito'ni lovo i imaa' ave nizave. 8 Gono lengita dune' nene vo gopo ogo haza ogalive. Monovotido' gizebo lamine' igi minilo. Ne'mine igi mini di dizikevo O'moso'mo ne'mi gihile've lengemavo muki' nene dalizave. 9 Malite Kilisito' gamazi've apizi ngimangu' minami ivile' igi ato' gamazi lilizani' nene O'moso di minamave. Ido' malite ato' gamazi lami Kilisito' gamazi've di minilizani' nene ingine metehingi gipelengi nene di minaa' nave. 10 Evene' malite Kilisito' gamazi've di minami mono' apizi lingimilisa nilavo ma lingine ngele'mizi numudingu' milamilo. Ido' mese' aseka li-ngidamilo. 11 Mese' aseka li-ngidilizave nete a'mine ve gono goloso dalizani' nene hize ele' ilisave. Nemu' nene mese' aseka li-ngidamilo.

nGopo'ni Lo-ngidine' Gamazi

12 Gamazi lo-lengemeloni' nene muki' ha neiha luhuvo niteku' gizelove lo gelamuve. Lengita vokuvo vetedunu' lo volelo' melo' ogo muludeu' lamine' goloso gelelone lo gelekuve. 13 Aluna O'moso'mo do kegeso ei' ve lo ele'mize molani' ne'mi izipahala zuho nete gopo'ni nilave. Moda ve.